ភ្នំពេញ៖ អ្នកជំនាញបានជំរុញឲ្យអ្នកដែលមានបំណងចង់ចាប់ផ្តើមអាជីវកម្ម លក្ខណៈកែច្នៃកសិផល សម្រាប់នាំចេញទៅទីផ្សារអន្តរជាតិ គួរតែព្យាយាមចាប់យកទីផ្សារចិន និងអឺរ៉ុបឱ្យជាប់ ដើម្បីរក្សានិរន្តភាពនៃការនាំចេញរបស់ខ្លួន។លោក សុង សារ៉ន ប្រធានសហព័ន្ធស្រូវអង្ករកម្ពុជាថ្លែងបែបនេះនៅក្នុងវេទិកានិងពិព័រណ៍ប្រចាំឆ្នាំស្តីពីជំនួញនិងឱកាសវិនិយោគក្នុងវិស័យកសិកម្មនាពេលថ្មីៗនេះ។
តាមរយៈបទពិសោធន៍ការនាំចេញរបស់វិស័យស្រូវអង្ករ រយៈពេល១០ឆ្នាំនេះ លោកកត់សម្គាល់ឃើញថា ទីផ្សារទាំងពីរនេះ ជាទីផ្សារដ៏មានសក្តានុពលដ៏សម្រាប់កម្ពុជាដែលអាចជំរុញឱ្យការនាំចេញបានលឿន និងមិនខាតពេល។ សម្រាប់ទីផ្សារចិន បានស្រូបយកប្រភេទអង្ករស និងអង្ករក្រអូបពីកម្ពុជាយ៉ាងច្រើន និងទីផ្សារអឺរ៉ុប បានស្រូបយកប្រភេទអង្ករក្រអូបរបស់កម្ពុជាជាង៩០%។
លោកបានគូសបញ្ជាក់ថា៖ក្នុងវិស័យកសិ-កែច្នៃម្ហូបអាហារ គឺមានតែទីផ្សារពីរទេ ដែលយើងត្រូវតែព្យាយាមចាប់យក គឺចិន និងអឺរ៉ុប ក្រៅពីនេះយើងនៅមានភាពស្មុគ្រស្មាញ។
លោក ចាន់ ពេជ្រ អ្នកគ្រប់គ្រងទូទៅនៃក្រុមហ៊ុន ស៊ីកនេតឈ័រ អហ្វ អេស៊ា បានលើកឡើងថា ទីផ្សារចិន និងអឺរ៉ុប គឺជាទីផ្សារដែលមានសក្តានុពល សម្រាប់ការនាំចេញរបស់ប្រទេសនានា មិនថាតែកម្ពុជានោះទេ។ ការចូលទៅទីផ្សារអឺរ៉ុបមិនមែនចូលទៅតែប្រទេសមួយទេ នៅក្នុងនោះគេមានបណ្តាញផ្គត់ផ្គង់ទៅជាង២០ប្រទេស នៅក្នុងទីផ្សារអឺរ៉ុប។
យោងតាមមន្ត្រីជាន់ខ្ពស់នៃក្រសួងកសិកម្មបានឱ្យដឹងថា ក្នុងរយៈពេល៤ឆ្នាំចុងក្រោយនេះ ប្រទេសចិនបានឈរនៅលំដាប់ទី១ ដែលនាំចូលអង្ករកម្ពុជាច្រើនជាងគេ ដែលបានស្រូបយកបរិមាណនាំចេញអង្ករពីកម្ពុជាចន្លោះពីជាង២០ម៉ឺនតោនទៅ៣០ម៉ឺនតោនក្នុងមួយឆ្នាំៗ។ ចំណែកទីផ្សារអឺរ៉ុបស្ថិតក្នុងលំដាប់ទី២ ដោយជារៀងរាល់ឆ្នាំកម្ពុជា បាននាំចេញអង្ករទៅអឺរ៉ុបរង្វង់ជាង២០ម៉ឺនតោន។ បន្ទាប់សហគមន៍អឺរ៉ុប បានបញ្ឈប់ការយកពន្ធលើការនាំចូលអង្ករពីកម្ពុជា នៅឆ្នាំ២០២២នេះ ការនាំចេញ បានចាប់ផ្តើមកើនឡើងវិញផងដែរ។
របាយការណ៍សហព័ន្ធស្រូវអង្ករកម្ពុជា បានឱ្យដឹងថា ក្នុងរយៈពេល៧ខែ នៃឆ្នាំ២០២២ កម្ពុជាបាននាំចេញអង្ករចំនួន៣៥០,៩០២តោន ទទួលបានទឹកប្រាក់ចំនួន២១៨.១៧លានដុល្លារសហរដ្ឋអាមេរិក។ ក្នុងនោះនាំចេញទៅកាន់ប្រទេសចិន ម៉ាកាវ និងហុងកុង បានចំនួន១៦៩,៧៦៦តោន ទទួលបានទឹកប្រាក់ចំនួន៨៩.០៩លានដុល្លារសហរដ្ឋអាមេរិក,សហគមន៍អឺរ៉ុបដែលមានចំនួន២៥ប្រទេស មានបរិមាណចំនួន១២២,៨៤២តោន ទទួលបានទឹកប្រាក់ ចំនួន៨៦.០៨លានដុល្លារសហរដ្ឋអាមេរិក៕ដោយ៖សិរីមតី
